Mai Khwab Hu .....

Mai khwab hu teri rato ka, subah hogi aur mit jaunga,
Aur ye bhi wada nahi karta fir kab laut kar aaunga.

Mai khwab hu bas achcha hoga, aankho me hi rahne de muzko
Kyu palko me chhupake rakha hai, ashko me hi bahane de muzko.
Ye mashwara hai Meri khatir apna sukun barbad na kar,
Aitbar nahi mera koi mai kab tutkar bikhar jaunga.
Aur ye bhi wada nahi karta fir kab laut kar aaunga.

Mai mahtaab hu teri khatir, teri tanhai kuchh kam karta hu,
Khamosh andheri rato me shayad kuchh roshani bharata hu.
Par tuzko bhi hai ilm, sahar jo sabse badi haqikat hai,
Raat khilunga band aaknho me khulte se murzaunga.
Mai khwab hu teri rato ka, subah hogi aur mit jaunga.

Kucchh khwab raatbhar chubhate rahe,Teri aankhe aksar ye kahati hai
Itna aziz kyukar ho khwab, kyu itna dard wo sahti hai.
Mai waqt tha tera jo shayad aaya tha aur ab beet gaya,
Na wo lamhe kaid tu kar payi, na mai khudko dohraunga
Aur ye bhi wada nahi karta fir kab laut kar aaunga.

Khwabo ke sahare jine ki nakam si koshish chhod bhi de,
Jo judaa nahi tha vakai me, us rishte ki dor ko tod bhi de,
Mai haar chuka sab kuchh apna tu fir bhi jeet nahi payi
Ab bas jaan bachi hai deneko aur kuchh bhi na ab de paunga.
Aur ye bhi wada nahi karta fir kab laut kar aaunga.

Zamane Yaad Aaye...

Ek tuze bas yad kiya to kitne zamane yaad aaye,
Naya naya ahsas hua jab din wo purane yaad aaye.

Kitni bate badal gayi hai par mai shayad wahi raha,
Pahale teri yaad aayi aur fir maykhane yaad aaye.
Naya naya ahsas hua jab din wo purane yaad aaye.

Hairani hoti hai aksar muzko insani fitrat se,
Mahfil ki us bhid se muzko kyu virane yaad aaye?
Naya naya ahsas hua jab din wo purane yaad aaye.

Sahar se pahale jab chand falak se rukhsat lenewala tha,
Meri zid aur uspar tere shokh bahane yaad aaye.
Naya naya ahsas hua jab din wo purane yaad aaye.

Aaj achanak raat andhere ek nazm jahan me bunane lagi,
Bazm-e-dosto ki wah wahi, kuchh khali paimane yaad aaye.
Naya naya ahsas hua jab din wo purane yaad aaye.

Wo darakht ab tut gaya hai, do hisso me bat bhi gaya,
Fir bhi usko dekhate muzko do deewane yaad aaye.
Naya naya ahsas hua jab din wo purane yaad aaye.

Aankho Ke Samne.....

Aankho ke samne jab bhi teri tasveer padati hai.
Yaade teri badi der tak fir muzase ladati hai.

Wo is kadar bachaati hai muze duniya ki nazar se,
Gazale bhi meri aksar akele me padhti hai.
Yaade teri badi der tak fir muzase ladati hai.

Mai is kadar shamil hu shayad uski duvao me,
Wo muskura bhi de to meri umr badhati hai.
Yaade teri badi der tak fir muzase ladati hai.

Meri taqdir me kuchh bhi nahi ab uske alawa,
Wo aaye to sawar jaye wo jaye to bigadti hai.
Yaade teri badi der tak fir muzase ladati hai.

Kin lafjo se samzaye ‘Shafaq’ falsafa marasim ka,
Majburan ruh bhi ek din jism se bichhadati hai.
Yaade teri badi der tak fir muzase ladati hai.


Falsafa : Philosophy, Marasim : Rishta, Relation, Ruh : Aatma, Soul.

Tera Chale Jana...


Har mulaqat ke baad tera chale jana, achcha nahi lagata,
Jate hue muzase wo tera hath chhudana, achcha nahi lagata.

Haal-e-dil mai jab tuzase bayan karata hoon,
Tera har baat pe shokh muskurana, achcha nahi lagata.
Jate hue muzase wo tera hath chhudana, achcha nahi lagata.

Tamanna meri bhi hai mai dekhu tuze sharmate hue,
Hathose yu chand chhupana, achcha nahi lagata.
Jate hue muzase wo tera hath chhudana, achcha nahi lagata.

Ishq nasha hai, bahakana jaruri hai bahot,
Har kadam pe sambal sambhal jana, achcha nahi lagata.
Jate hue muzase wo tera hath chhudana, achcha nahi lagata.

Nazar mile to dilo ki guftgu bhi ho 'shafaq',
Nazar mile na mile ke zukana, achcha nahi lagata.
Jate hue muzase wo tera hath chhudana, achcha nahi lagata.

Teri Yado Ki...

Tere yado ki saba raatbhar chalati rahi,
Dhadkane tez ho hokar ke sambhalati rahi.

Chandani raat thi, roshan tha chand bhi lekin,
Puri shab teri hi teri kami khalati rahi.
Dhadkane tez ho hokar ke sambhalati rahi.

Der tak jalati rahi aankhe,ashq bahate rahe,
Shamma bhi sath sath pighalati rahi.
Dhadkane tez ho hokar ke sambhalati rahi.

Mere manind chand bhi jaga tha 'shafaq',
Raat bebas bhi karavate badalati rahi.
Dhadkane tez ho hokar ke sambhalati rahi.

Kitani Bate Hai....


Zuthi Muskan jo chehare pe saja rakhi hai,
kitani bate hai jo bevaja rakhi hai.

Unki shokhiyo ko dekhu ya ishq ko samzu,
Na bhi kahate hai aur chehare pe raja rakhi hai.
kitani bate hai jo bevaja rakhi hai.

Duniyadari sikh li hai, ab napak hu mai,
Teri tasveer magar aaj bhi pakija rakhi hai.
kitani bate hai jo bevaja rakhi hai.

Mai Ye sawal rozana karata hu apne khuda se,
Dilkash libas me kyu ishq ki saja rakhi hai.
kitani bate hai jo bevaja rakhi hai.

Koi dekhe na haqikat me kya hai tu 'Shafaq',
Darvaja band aur battiya bujha rakhi hai.
kitani bate hai jo bevaja rakhi hai.

Sadiyo se nibha rahe hai kuchh zuthe rishte,
Upar se mukkamal bhitar se tute rishte.

Jab kabhi bhi rishto me takrar hui, pech lagi,
Padosiyo ne bade maje se lute rishte.
Upar se mukkamal bhitar se tute rishte.

Jid jo puri hui to hasane lage, hasane lage,
Nahi to der tak bachchose ruthe rishte.
Upar se mukkamal bhitar se tute rishte.

Ub jane pe feka to sahi par ye na dekha tumne,
Kaanch ke jaise chhanse kaise fute rishte.
Upar se mukkamal bhitar se tute rishte.